吃喝玩樂

已經有半年無去鏞記飲茶喇，自從做左呢份工之後，一來返shift無時間，二來收入不豐下，自然少去呢d「高級娛樂場所」。
鏞記燒鵝真係遠近馳名，每日限賣200隻，當然百幾蚊半隻鵝未必人人捨得，而且我試過買返屋企之後，皮變軟之後口感會變差。不過其實鏞記都有好多美食架，不竟老闆係日本著名飲食節目「料理之鐵人」既評判嘛。
我比較喜歡鏮記既「叉燒包」，同「冰心皮蛋」，入口即化。如果夜晚去的話，仲會遇到好多名星、有錢人架！不過記得訂位喎。

記得有一次冬天，因為唔習慣台灣氣壓，所以成日都係旅館zzz，一直到夜晚，好肚餓，就由月亮車我去士林夜市，可惜因為太夜喇 (其實只係夜晚十二點)，所有店都差不多關門，饑腸轆轆，只係得一間舖未收，招牌係「十全排骨」，十全排骨其實係藥燉排骨湯，天寒地凍就最o岩架喇，每次我再去士林，都會記得果次太夜無野食果種痛苦，同埋十全排骨湯既味道。

士林夜市最出名，莫過於「大餅包小餅」，一塊大餅包，包住小酥餅，再選擇你要咩口味，我比較喜歡花生味，見到老闆最後，手掌用力一拍，就食得喇。價錢都好平，大包都係20蚊台幣一份咋！
係我第一次去士林夜市時食到既美食。

香港人消暑就會飲「冬瓜水」，台灣人就會飲「愛玉冰」。
有一年去台灣淡水探網友既時候，係路邊街角見到有賣一種飲品，叫做「愛玉冰」，買黎飲下，覺得味太甜，不過返到香港，就搵下有無呢種飲品既資料，原來又係台灣先有既飲品。
愛玉子，係台灣特產，民間傳說，佢既汁液用水一沖，就會變成愛玉凍，好似jelly一般，再加入糖同冰水，就變成愛玉冰喇，可以解暑。

荷蘭人統治台灣時，引入台灣既水果，第一次去月亮屋企做客時食到既水果。清、爽、甜。
比香港買到既大陸產品大好多同甜好多，台灣真係可以稱為水果王國。
係香港，偶然我都會買黎食既，屋企人就唔多識食。

呢個名好聽呀，不過就係我地香港叫開既「蕃鬼荔枝」喇…

台東最出名既水果就係「釋迦」，比香港買到果d大好多。(其實我覺得蓮霧都係台灣好食d)
果一年去到台灣，拿住係手，咁大粒核、皮食唔食得呢？真係唔知點食，哈哈~
不過真係好好食。

 每次去台灣都係自己一個人去，所以會食到好多香港人跟團食唔到既美食，當然，月亮經常帶我四圍吃，又經常到她家作客，自然食到好多難得美食。
好似「烏魚子」，在香港就無法食到，第一次食烏魚子時，感覺無咩特別，但貴為台灣名產之一，習慣左之後，慢慢就覺得食完有種齒頰留香感覺。
烏魚子係用烏魚既卵，用鹽醃漬、曬乾再壓製而成，做法有d似我地既臘腸。價錢大約800~2000元台幣/片
一般食法係燙熟後切片，配以生蒜或生白蘿蔔、蔥段，點醬油食。一般都係台灣過年先有得食(季節性)。

另一樣香港好少食到(我屋企附近都仲食到喎，哈哈)，煮成湯，配搭麵一齊食既「肝連」，有時候會配搭薑絲、醬油一齊食，如果大家係蔡瀾既fans，就會成日聽到佢話好好味既「豬肺裙」，其實就係「肝連」喇，香港係比較難買到，指內臟例如肝、肺邊，附帶既少少肉，一般肉檔老闆會自己收埋黎食，或者只係賣俾熟客，所以家庭主婦比較難買到。很清淡爽口有咬勁。