吃喝玩樂

記得兩年前寫過一篇關於鴻燕既食評，對佢地「口水雞」、「油淋雞」同「回鍋肉」都讚不絕口。當時同katty、vivian、大師姐、ming sir 仲有幾個網友(sorry，已經唔記得…)，店面太細，坐左我地已經差不多做唔到其他生意。
應該搵唔返我篇食評 (雖然曾經係網上流傳過…)，果時同d同事講起，話元朗有間好食既小店，Ada問我個地址，佢諗左一陣，就話：「咦？咪即係我屋企後巷？」，哈哈，有人住左十幾年都唔知自己屋企後巷有間正野。
早排Ada同我講，鴻燕已經執左，真係可惜。

我本人好鍾意食野，所以好多時都會去唔同地方食有特色既菜，不論高檔、平民化、街邊小吃、咩國家食品都會試下。但係有一間餐廳，雖然已經係六年前既事，真係要同大家介紹下，係中港城平台有一間泰國菜餐廳叫做「HER」，中文叫做「她泰國餐廳」。
呢一間係我食過最唔掂既餐廳之一，除左可以睇到維多利亞港夜景(前提係你要坐到窗口位)之外，簡直係一無可取既餐廳。
一入到餐廳，你會見到餐廳掛滿中式大紅燈籠，但係光線明顯不足，睇唔到餐牌。(尖沙咀諾士弗台果間「天與地」都係咁上下黑)
之後打開餐牌，睇下價錢，咦？冷汗直流，每人平均消費無200蚊唔駛落樓…
當然佢既客唔少架，食品質素叫做ok啦，不過熟客會更好，但佢地就會有所謂「欺生」(欺負生客)情況。
但係service真係九流，我指侍應既招待，你唔出聲故然無人理你，你出聲亦都未必會過黎幫你。如果你叫「咖喱蟹」佢地永遠唔識得主動俾個鐵鉗你，我雖然無叫「咖喱蟹」，但就同一時間聽到四五檯一齊叫「唔該俾個鉗我」，唔識得主動同客人斟水已經係罪過。
埋單時，你會發覺，全港第一間會收加一，而又俾唔到service既泰國餐廳… 你已經中左招。

02年6月，陳東記結業，對「陳東記」美食既懷念只能在回憶裡。
電影「食神」令到到陳東師傅既「瀨尿牛丸」家傳戶曉，當年因為想試下呢味菜，專登走去尖沙咀陳東記，當年客似雲來，一坐低就會奉上功夫茶俾客人，陳東記係以潮州菜為主，每次去我都會點幾味菜，鹵水鵝片、蠔仔粥、食神牛丸麵、楓蜜川椒豬頸肉(現已失傳…可惜…)、鴨肉酥盒…
瀨尿牛丸秘訣係將瀨尿蝦(台灣叫「蝦蛄」)肉剁碎，加入豬油粒做餡，豬油遇熱溶化，令到牛丸變成中空，所以可以在檯上彈起。
晚膳時間，多數可以見到一個大肚腩，全身帶著很多金牌既陳師傳係店入面四圍穿梭，佢會同食客傾偈，問下客人對菜式既意見。
轉眼間陳師傅已經離開左四年，一代食神，仍然長留好多人心裡。

第一次去天母時，就係去食「蒙古烤肉」，好多台灣既網友第一次見我都係約係天母西路上的「大可汗蒙古烤肉餐廳」，首先你可以去選擇你要食既肉同菜：

可以選豬、牛、羊肉，可以選擇你要咩菜，一般都係A菜、高麗菜同通心菜，青椒絲等。之後就行去長檯，你會見到一瓶瓶既醬料、醬油、檸檬汁、酒、九層塔、芫茜…
自己溝既一碗「肉同汁」既野，就要交俾我地既–蒙古大「漢」喇~

咁佢就會幫你炒熟佢…係一隻大鐵板上面，用兩支長筷子，一邊炒，一邊行
之後…
就會變成「蒙古烤肉」喇

呢一間係「食到飽」(自助餐任食)，消費大概係$100港幣左右。
地址係：台北市天母西路105號

我仲有一張九折券，可以print 出黎就用得：

我阿媽雖然係食魚專家，但講到蟹，佢就輸我九條街，佢咁大個人都未食過大閘蟹同黃油蟹，於是今日放工，見到d 黃油蟹好靚，就買左幾隻返去喇。
農曆六月至七月係黃油蟹既季節，打開個殼，成隻都充滿黃油，蟹羔又肥美。
因為太累，放左工就訓左一陣，結果訓醒，阿媽已經蒸好d蟹，我一睇，唉，浪費。因為全部蟹都好生猛，所以我媽唔識煮，只係反轉蒸，結果d 蟹四圍爬，d黃油已經走晒去鑊蓋… 無晒… (我老爸洗到手軟，媽媽聲，哈)
於是一邊食一邊教佢煮喇，其實黃油蟹最緊要係黃油，無左黃油就只剩下羔，打晒折扣。
煮法係應該先用冰水凍死d蟹，再放入雪櫃三十分鐘，之後反轉蒸十分鐘，就可以食得喇。

尋日係西灣河一間著名既鹵水店買左鹵水鵝同豬耳，名店即係名店，除左排長龍之外，d肉質真係鮮美，特別係上莊 — 鵝既上半部，皮薄肉厚，又軟又嫩。
豬耳先係極品，豬耳既軟骨唔會太硬又有咬口，d皮肉咬落去唔覺得肥，d毛刮得好乾淨。
一般人買鵝，喜歡飲酒既可能會買鵝頭、鵝翼、鵝頸、鵝掌。而家庭主婦可能會買下莊，即係鵝係下半部，貪佢有隻脾，其實下莊只係得個脾食得，連住個鵝屁股未必有人食，下半身又比較肥，所以想啖啖肉，記得要上莊！
真係要推介，係西灣河太安樓對面，順興潮汕滷味專門店，佢地會幫你去埋骨。

已經有半年無去鏞記飲茶喇，自從做左呢份工之後，一來返shift無時間，二來收入不豐下，自然少去呢d「高級娛樂場所」。
鏞記燒鵝真係遠近馳名，每日限賣200隻，當然百幾蚊半隻鵝未必人人捨得，而且我試過買返屋企之後，皮變軟之後口感會變差。不過其實鏞記都有好多美食架，不竟老闆係日本著名飲食節目「料理之鐵人」既評判嘛。
我比較喜歡鏮記既「叉燒包」，同「冰心皮蛋」，入口即化。如果夜晚去的話，仲會遇到好多名星、有錢人架！不過記得訂位喎。