吃喝玩樂

上一次去完浸溫泉之後，半夜就去左呢一間茶藝館食飯喝茶。24小時營業既茶館，古色古香，品嘗既係古早味既家常菜，喝既係頂級茶葉。
台式古早風味料理，係坊間唔容易食到架，係台灣鄉村菜，像「破布子」就不是一般餐廳會供應的食物，我都係第一次食到。
而且，一個廂房入面食，正如相片中既一樣，對於我呢一種肥人黎講，坐係蒲團上面，對腳又唔知放邊好，真係坐得辛苦，唯有將對腳伸入檯底:p。
古舊大門、花窗，各式各樣茶壺、茶具，各類形的枕木、古董、盆栽、各種造型的實木桌椅，自己泡茶，真係置身古代一樣。
如果你唔愛喝茶的話，可能會覺得菜有d 咸呢。

地址：台北市承德路7 段1號

最近新聞頭條係大陸輸港鰻魚九成含有致癌物「孔雀石綠」，香港就暫停輸入鰻魚。唉，我最鍾意食鰻魚，日本係大陸投資一個好大既鰻魚場，呢次唔止影響香港，其實對日本都好大影響。
要做一碗鰻魚飯，要好多工序，差不多要一個小時，剖鰻→串鰻→白燒→蒸鰻→抹醬→炭烤→添飯→抹醬於飯上→擺上鰻魚。
最重要係醬汁，日本叫鰻魚做「穴子魚」，穴子魚醬係鰻魚飯既靈魂，好既醬汁可以去腥味，甜味能增進食慾，而浦燒就最能帶出鰻魚香氣。
唉，幾時先有鰻魚食呢？

台灣冬天三寶，薑母鴨係其中之一，被稱為帝王食補，其實就好似火鍋咁，一個鴨肉煲，加入炸豆皮，因為薑可以驅寒，所以冬天食會覺得好好，不過我地夏天去，結果一身汗。

最後一日放工時，同事俾左少少comment我個blog，就係唔好成日帶佢地去食野，想我寫多d內心感受，特別係最後一日上班既感受。
放工時，心入面諗，可能有排都唔係紅磡區食飯，不如食餐好d，我記得紅磡有一間贏到優質旅遊服務獎，又參加左食神爭霸戰既名店，我又鍾意飲湯，放左工就去喇… (結果都係去左食…)
「小魚滋味」開業不足三年，但就好多人都識得佢，因為佢地師傅都係名廚，招牌菜係「蒜香豆酥魚」，不過今日係為左興祝我離開公司既日子，當然要揀自己喜歡既菜啦。
「招牌鮮魚湯」一煲上，奶白色既魚湯，一定要趁熱喝，唔係凍左就會腥架喇，魚肉好嫩滑，湯好細滑，無渣，飲完覺得唔夠喉，於是再叫一個「照燒銀雪魚泡飯」，銀雪魚用日式照燒方式，分碟上，飯係魚湯泡飯，呢個算係水準之作，再叫兩個小食，「曲香怪味雞」、泰式豬頸肉、椒鹽豆腐粒… 想叫椒鹽魷魚鬚不過今晚無供應，改叫「酥炸魚腐」，不過…魚腐無乜味道… =.=”
怪味雞我以前係鴻燕食過，呢到d雞皮薄無肥肉，感覺呢一間店如果能夠保持水準，生意一定非常好。

記得兩年前寫過一篇關於鴻燕既食評，對佢地「口水雞」、「油淋雞」同「回鍋肉」都讚不絕口。當時同katty、vivian、大師姐、ming sir 仲有幾個網友(sorry，已經唔記得…)，店面太細，坐左我地已經差不多做唔到其他生意。
應該搵唔返我篇食評 (雖然曾經係網上流傳過…)，果時同d同事講起，話元朗有間好食既小店，Ada問我個地址，佢諗左一陣，就話：「咦？咪即係我屋企後巷？」，哈哈，有人住左十幾年都唔知自己屋企後巷有間正野。
早排Ada同我講，鴻燕已經執左，真係可惜。

我本人好鍾意食野，所以好多時都會去唔同地方食有特色既菜，不論高檔、平民化、街邊小吃、咩國家食品都會試下。但係有一間餐廳，雖然已經係六年前既事，真係要同大家介紹下，係中港城平台有一間泰國菜餐廳叫做「HER」，中文叫做「她泰國餐廳」。
呢一間係我食過最唔掂既餐廳之一，除左可以睇到維多利亞港夜景(前提係你要坐到窗口位)之外，簡直係一無可取既餐廳。
一入到餐廳，你會見到餐廳掛滿中式大紅燈籠，但係光線明顯不足，睇唔到餐牌。(尖沙咀諾士弗台果間「天與地」都係咁上下黑)
之後打開餐牌，睇下價錢，咦？冷汗直流，每人平均消費無200蚊唔駛落樓…
當然佢既客唔少架，食品質素叫做ok啦，不過熟客會更好，但佢地就會有所謂「欺生」(欺負生客)情況。
但係service真係九流，我指侍應既招待，你唔出聲故然無人理你，你出聲亦都未必會過黎幫你。如果你叫「咖喱蟹」佢地永遠唔識得主動俾個鐵鉗你，我雖然無叫「咖喱蟹」，但就同一時間聽到四五檯一齊叫「唔該俾個鉗我」，唔識得主動同客人斟水已經係罪過。
埋單時，你會發覺，全港第一間會收加一，而又俾唔到service既泰國餐廳… 你已經中左招。

02年6月，陳東記結業，對「陳東記」美食既懷念只能在回憶裡。
電影「食神」令到到陳東師傅既「瀨尿牛丸」家傳戶曉，當年因為想試下呢味菜，專登走去尖沙咀陳東記，當年客似雲來，一坐低就會奉上功夫茶俾客人，陳東記係以潮州菜為主，每次去我都會點幾味菜，鹵水鵝片、蠔仔粥、食神牛丸麵、楓蜜川椒豬頸肉(現已失傳…可惜…)、鴨肉酥盒…
瀨尿牛丸秘訣係將瀨尿蝦(台灣叫「蝦蛄」)肉剁碎，加入豬油粒做餡，豬油遇熱溶化，令到牛丸變成中空，所以可以在檯上彈起。
晚膳時間，多數可以見到一個大肚腩，全身帶著很多金牌既陳師傳係店入面四圍穿梭，佢會同食客傾偈，問下客人對菜式既意見。
轉眼間陳師傅已經離開左四年，一代食神，仍然長留好多人心裡。